Amasomo y’ Igitambo cya Misa cyo ku wa Gatandatu 11 Ugushyingo 2023 Icyumweru cya 31 Gisanzwe
Abatagatifu twizihiza: Martin de Tours, Ménas, Maxime
Isomo rya Mbere
Ibaruwa Mutagatifu Pawulo Intumwa yandikiye Abanyaroma(Rom 16, 3-9.16.22-27)
Bavandimwe, 3mutashye Purisika na Akwila, abafasha banjye muri Kristu Yezu ; 4abo ni bo bishyize mu kaga kugira ngo barwane ku buzima bwanjye. Si jye jyenyine ubashimira, ahubwo na Kiliziya zose z’abanyamahanga. 5Mutashye na Kiliziya ijya iteranira mu rugo rwabo. Mutashye incuti yanjye Epayineto, we muganura Aziya yahaye Kristu. 6Mutashye Mariya wabavunikiye. 7Mutashye bene wacu Andironiki na Yuniya twasangiye umunyururu ; ni intumwa z’ibirangirire kandi babaye aba Kristu mbere yanjye. 8Mutashye Ampiliyato, incuti yanjye muri Nyagasani. 9Muntahirize Urubano umufasha wanjye muri Kristu, ndetse na Sitaki incuti yanjye. 16Nimuramukanye mu muhoberano mutagatifu. Kiliziya zose za Kristu zirabatashya. 22Nanjye ndabatashya muri Nyagasani, jyewe Teritiyo wanditse uru rwandiko. 23Arabatashya Gayusi uncumbikiye jye na Kiliziya yose. 24Arabaramutsa Erasito umubikamari w’umugi, n’umuvandimwe Kuwariti.
25Nihasingizwe Imana, Yo ifite ububasha bwo kubakomeza bihuje n’Inkuru Nziza nabashyikirije namamaza Yezu Kristu, nkurikije iyobera ryari ryaracecetswe kuva kera kose, 26ubu rikaba ryahishuriwe abanyamahanga bose, rikagaragarira mu byanditswe by’abahanuzi. Nguko uko Imana Ihoraho yabigennye, kugira ngo na bo ibageze ku kwemera bayumvire. 27Imana Nyir’ubuhanga nihabwe ikuzo muri Yezu Kristu, uko ibihe bihora bisimburana iteka. Amen.
Iryo ni Ijambo ry’Imana.
ZABURI
Zaburi ya 145 (144), 2-3, 4-5, 10-11
Inyik Nyagasani Mana yanjye, nzasingiza izina ryawe iteka ryose.
Buri munsi nzagusingiza, Nogeze izina ryawe iteka ryose. Uhoraho ni igihangange, akaba rwose akwiriye gusingizwa; ubwamamare bwe ntibugereranywa.
Kuva mu gisekuru kugera mu kindi bazibukiranye ibyo wakoze, bamamaze ibigwi byawe. Nzajya ndondorera abandi ibitangaza byawe, mvuge ikuzo ryawe ry’urukerereza, rijyana n’ubwiza bwawe.
Uhoraho, ibiremwa byawe byose nibijye bigushima, abayoboke bawe bagusingize! Bazarate ikuzo ry’Ingoma yawe, batangaze ubushobozi bwawe.
Isomo rya Kabiri
Ivangili
Amagambo yo mu lvanjili ntagatifu uko yanditswe na Mutagatifu Luka(Lk 16, 9-15)
Muri icyo gihe, Yezu abwira abigishwa be ati 9« Reka rero mbabwire: ayo matindi y’amafaranga nimuyashakishe incuti, kugira ngo umunsi mwayabuze, izo ncuti zizabakire aho muzibera iteka. 10Udahemuka mu bintu byoroheje, ntahemuka no mu bikomeye; naho uhemuka mu bintu byoroheje, ahemuka no mu bikomeye. 11None se nimuterekana ko muri indahemuka mu matindi y’amafaranga, ni nde uzabashinga ibifite agaciro k’ukuri ? 12Niba kandi muterekanye ko muri indahemuka mu bintu bitari ibyanyu, ibibagenewe muzabihabwa na nde ? 13Nta mugaragu ushobora gukorera ba shebuja babiri : azanga umwe akunde undi, cyangwa azibanda kuri umwe asuzugure undi. Ntimushobora gukorera Imana na Bintu.»
14Abafarizayi bikundiraga amafaranga, bumvise ibyo byose baramukwena. 15Yezu arababwira ati «Mukunda kwigira intungane mu maso y’abantu, ariko Imana izi imitima yanyu. Koko icyo abantu baha agaciro, ni cyo kiba kigayitse mu maso y’Imana.»
Iyo ni Ivanjili Ntagatifu
Amasomo matagatifiu Kiliziya umubyeyi wacu yaduteguriye kuri uyu munsi aradushishikariza gusingiza Imana, yo ifite ububasha bwo kudukomeza bihuje n’inkuru nziza, kuko ariyo tugomba gukorera yonyine.
Mu isomo rya mbere Pawulo intumwa aratwigisha umuco mwiza wa gikristu wo gufatanya ubutumwa. Aratangira asuhuza kandi ashimira abavandimwe bose azi kandi bamufashije kwamamaza Yezu Kristu. Bamwe mu bamwitayeho kandi baramugoboka, abandi bashyize ubuzima bwabo mu kaga ngo barwane ku buzima bwe. Arasaba bose ko baha Imana nyir’ubuhanga ikuzo muri Yezu Kristu. Abakristu twese duhamagariwe kwigana Pawulo mu buryo bwe bwo gutekereza, gukora ndetse no kubaha abana n’abandi. Pawulo intumwa yizera adashidikanya ko umugambi umwe rukumbi w’Imana ari umukiro w’abantu bose. Umukiro niwo mugambi w’iyobera ry’Imana muri Yezu Kristu, iryo yobera ryatangarijwe kandi rigahishurirwa abemera Imana.
Ntakindi Imana idushakira kitari agakiza. Ihora ishaka ko abantu bose bagera ku mukiro kandi bakamenya ukuri, urubanza no gucibwa bitambamira umugambi w’Imana wo kudukiza. Imana ihorana ineza n’ubuntu, impuhwe n’imbabazi biyitera gutsimbarara ku bantu bayigomekaho kandi bajya kure yayo.
Bikira Mariya yatubwiye ko isi yigometse ku Mana, yameze amenyo kandi irimo ijya ahabi, igiye kugwa mu rwobo. Adusaba guhinduka no kugarukira Imana.
Mu ivanjili Yezu aradusaba gukorera Imana yonyine. Kwirinda ko imitima yacu yatwarwa n’iby’isi. Ashyira ku rwego rumwe Imana n’amafaranga, kubera Imana n’amafranga isaba umutima wacu wose n’ubwenge bwacu. Iyo dukunze amafaranga atuma tuba abahemu kandi nta mahoro aduha. Tumenye ko ibifite agaciro ari ubuzima bwa roho zacu , umukiro n’amahoro Imana itanga.
Dusabe Nyagasani aduhe ingabire yo kumukuza, kumuramya no kumukorera tutiziganya.
Padiri Jean Pierre GATETE.SAC
