Amasomo y’ Igitambo cya Misa cyo ku wa Kane 21 Ukuboza 2023 Icyumweru cya 3 Cy`Adventi
Abatagatifu twizihiza: Pierre Canisius, Séverin
Isomo rya Mbere
Isomo ryo mu gitabo cy’Indirimbo ihebuje (Ind 2, 8-14)
Ndumva ijwi ry’uwo nkunda! Nguyu araje, arataraka mu mpinga, arasimbuka imisozi. Uwo nkunda ameze nk’isha cyangwa ishashi y’impara. Dore nguyu ari inyuma y’inkike yacu, ararungurukira mu madirishya, arahengereza mu mbariro.
Uwo nkunda yateruye kuvuga arambwira ati” Haguruka, ncuti; iyizire, mwiza wange. Dore itumba rirashize, imvura irahise, yaracitse, indabo zakwiriye igihugu, igihe cy’inkera cyageze, ijwi ry’inuma ryumvikanye mu gihugu. Umutini waturitse imbuto zawo za mbere, n’imizabibu yarabije, iratama impumuro zayo nziza. Cyo haguruka, ncuti, iyizire mwiza wange.
Kanuma kange kibera mu mitutu y’urutare, mu bwihisho bw’imanga, reka nirebere mu maso yawe, niyumvire n’akajwi kawe, kuko ijwi ryawe rishimishije, n’uburanga bwawe bugatera ubwuzu!”
Iryo ni Ijambo ry’Imana.
ZABURI
Zaburi ya 32 (33), 2-3,11-12,20-21
Nimukomere mu mashyi Uhoraho, nimumuririmbire indirimbo nshya!
Nimusingize Uhoraho mucuranga icyembe, munamucurangire inanga y’imirya cumi. Nimumuririmbire indirimbo nshya, mumucurangire binoze muranguruye amajwi!
Nyamara umugambi w’Uhoraho ugumaho iteka ryose, n’ibitekerezo by’umutima we bigahoraho, uko ibihe bigenda biha ibindi. Hahirwa ihanga Uhoraho abereye Imana, hahirwa umuryango yitoreye ngo ube imbata ye.
Twebwe rero twizigiye Uhoraho; ni we buvunyi bwacu n’ingabo idukingira. Ibyishimo biri mu mutima wacu ni we bikomokaho, Amizero yacu akaba mu izina rye ritagatifu.
Isomo rya Kabiri
Ivangili
Amagambo yo mu lvanjili ntagatifu uko yanditswe na Mutagatifu Luka(Lk 1,39-45)
Muri iyo minsi, Mariya yarahagurutse agenda yihuta, ajya mu misozi miremire mu mugi wa Yuda, agera kwa Zakariya, aramutsa Elizabeti. Nuko Elizabeti yumvise indamutso ya Mariya, umwana atwite yisimbiza mu nda, maze Elizabeti yuzura Roho Mutagatifu. Arangurura ijwi ati « Wahebuje abagore bose umugisha, n’Umwana utwite arasingizwa. Mbikesha iki kugira ngo nyina w’Umutegetsi wanjye angenderere? Dore mbaye ncyumva indamutso yawe, umwana yisimbagizanya ibyishimo mu nda yanjye. Urahirwa, wowe wemeye ko ibyo watumweho na Nyagasani bizaba. »
Iyo ni Ivanjili Ntagatifu
Amasomo matagatifu Kiliziya umubyeyi wacu yaduteguriye aradushishikariza kwishimira Imana iduha umugisha uturuka Ku ihirwe ryo kwemera ibyo idusezeranya.
Mu isomo rya mbere umuhanuzi Sofoniya arahamagarira abantu b’Imana kurangurura ijwi ry’ibyishimo kuko Imana yiyemeje kubakiza no kubakuriraho ibyabashikamiraga byose. Umukiro Imana ibazaniye ugomba kubatera ibyishimo. Natwe duhamagariwe guhindura imigenzereze ishaje, tukitegura kwigiramo ubuzima bushya bushingiye ku ivuka ry’umucunguzi wacu. Kuko Imana muri Yezu kristu yiyemeje kubana natwe no kutubamo rwagati. Ntishobora kudutererana bibaho, natwe tuyizere kandi tuyiringire kuko itazigera itwibagirwa. Kuba Imana irikumwe natwe bidutere gutsinda ubwoba, ubwigunge, n’ukwiheba, maze tube abantu basangiza abandi ibyishimo nkuko umubyeyi Bikira Mariya yagiye gusangiza inkuru nziza y’ibyishimo umuvandimwe we Elizabeti.
Nibyo ivanjili itubwira, uku guhura kw’ababyeyi babiri bakomeye mu mateka y’umukiro w’abantu byabaye ikimenyetso cy’urukundo bafitanye, n’ibyishimo roho mutagatifu yashyize mu buzima bwabo. Bikira Mariya aterwa ibyishimo no kwegurira Imana ubusugi bwe, Elizabeti agashimishwa nuko yiyeguriye Imana iminsi n’’imyaka y’ubugumba bwe, ategerezanya ukwemera, ugukurwa mw’isoni n’Imana. Umwe atwaye umukiro, undi atwite uzaba integuza y’umukiro. Natwe tubigireho kuba imiyoboro y’umukiro w’Imana, twemere ko amasezerano, kandi tubyemere turangwa n’ibyishimo n’urukundo.
Dusabe Nyagasani ingabire y’ibyishimo bidutera gushimisha abandi, kandi ukwemera tumufitiye kudutere guhirwa nk’umubyeyi Bikira Mariya.
Bikira Mariya Nyina wa Jambo udusabire
Padiri Jean Pierre GATETE. SAC
